ائمه اربعه

گِرّ کنت وهدے دل که نادانیں         مهنتاں زندے گٻش کنت گرانـیں

دریگتیں بیتکین أنت پدءَ پیشی          وژدلیں بــاریـگ وش ءُ شـادانـیں

پاس کنت هنچو دل شپے پاساں         تو گـوشے زاناں تـبلے حــیوانـیں

بیا که بندیگاں تــئی زهــیرانـی         آتکگ أنت موسم سارتءُساچانیں

بازیں انسانے دنیاءِ تها کیت ءُ روت بلے کم أنت آ کساں که رند چه وت ءَ نیکیں رند پدءُ اثر پشت گیج أنت.

واجه مولانا عبدالعزیز چه همے وڑیں مردمان أت که خدا آئیءَ په بلوچستانءِ مردماں که ماں جهل ءُ نازانتی ءِ تها بُڈتگ إتنت گچینی کت؛ پرچا که هر وهدے که خدا یک راج ءُ قومیءِ خیرءَ بلوٹیت گڈا آیانی تها کارزانتین ءُ سربراهیں عالم پیداگ کنت.

واجه ءِ زندگی سک دراج کشءُ جهل ءُ برزإنت که وت یک کتابے بیت بله من ماں إے نبشتانک ءَ یک لمبے چه آئی ءِ زندءَ نزّ آرتگ .

واجهءِ پیدا بوگ

واجه مولاناعبدالعزیز آذر ماهءِ سومی روچ 1295هـ .ش ءَ ماں شهرستان سربازروستای دپکورءَ پیداگ بوت.

وانگءِ بنگیج کنگ ءُ آئیءِ رندگیری

واجه چه هما اولءَ سکّیں زرنگیں مردی أت ءُ په وانگ ءُ زانگءَ سک حبی هست أت بنگیجی کتابانی وتی آریپیں پتءِ گورءَ ونت ءُ په وانگ ءِ رند گیری ءَ هندءِ مزنتریں اسلامی مرکز «دارالعلوم ءِ دیوبند» ءَ نام نبیسی کتءُ آخر سرءَ ماں دهلی مولانا کفایت الله دهلوی محضرءَ شتءُ کٹءُ سوبی  گپت ءُ ماں سالءِ1320هـ .ش ءَ وتی وانگی در برتءُ وتی ماتیں وطنءَپچ ترإت.

وانینگ ماں مدرسه صولتیهءَ

سال 1328ءَ په حرمین شریفین ءِ زیارت ءَ شتءُ دو سال پُرّیں ماں مدرسه صولتیه ءَ درسی دات.

پچ ترگ چه مکهءَ

واجه ماں سال1330ءَ رند چه وتی پتءِ لوٹگءَ په وتی ملکءَ پچ ترإت ءُ مدرسه عزیزیهءَ ماں دپکورءَ بنگیج کتءُ هور گوں إے دگه عالماں وانینگءَ گلائیش بوت.

دیم په زاهدانءَ

آوهداں ماں زاهدانءَ قبر پرستیءُ پیر پرستی سک رواج أت ءُ بدعتانی جمبڑا إے هَندءَ مان پوشتگ أت؛ بلے گوں واجهءِ آیگ ءَ اسلامءِ روچ چه جمبڑانی پشتءَ در آتکءُ ظاهر بوت.

إے سفرءِ داستان إے پیم أت که سالءِ1335هـ .شءَ واجهءِ پت نادراه بوتءُپه علاجءَ زاهدانی آرتءُ یک ماهے ماں زاهدان إش داشت. زاهدانءِ مردم ماں إے یکیں ماهءَ واجه إش پجّاه آرتءُ چه آئیءِ علمءُ زانتءَ سهیگ بوت أنتءُ چه واجهءِ پتءَ دزبندی إش کت که وتی چکءَ اجازه بدنت تاکه همیشه زاهدانءَ نندوک ببیت. واجهءِ پتءَ هں اجازه دات.

گڈا واجه ماں هما سالءَ چه سربازءَ لڈإتءُ زاهدان ءَ آتکءُ رند چه قاضی شاه محمد عالی زهی ءِ وفاتءَ په اهلسنتءِ امام جمعهءَ تعیین کنگ بوتءُ اولیگیں نماز جمعه إی گوں12مقتدیءَ وانینت.

واجهءِ گچین بوگ په استانءِمردمانی

کماشیءَماں خبرگانءِ مجلسءَ

رند چه انقلاب اسلامیءِ پیروزیءُ سوبیں بوگءَ، واجه په استانءِ مردمانی کماشی ءَ ماں خبرگانءِ مجلسءَ گچین کنگ بوتءُ چه اهلسنتءُ بلوچ راجءِ حقاں دیم مَٹیءُ دفاع کت.

دارالعلومءُ مسجدمکیءِ بنگیج کنگ

یکے چه واجهءِ فرهنگی خدمتاں زاهدانءِ مسجد مکیءُ دارالعلومءِ بنگیج کنگ إنت.

مسجدمکیءِ نمازیءُ آئیءِ مدرسهءِ طالباں روچ په روچءَ گیش بوگ أنت إے درستاں چه واجهءِ ستک، اخلاصءُ بامگواهی دعایانی بروردءُ ثمرأنت.

واجهءِ صفات

1 .  دوستی گوں پیغمبرءَ

واجهءَ گوں سردارءِ دوجهانءَ همینچو دوستی ءُ حب هست أت که چه بیانءُ وصفءَ درإنت.

2 . اهل علمءِ دوستی

واجه په طالبءُ عالماں باز إحترام إیرکتءُ اگاں آئیءِ دیوانءَ طالبے یا عالمے بیاتکیں؛ گڈا واجه آئیءَ توار کتءُ برزینءُمناسبیں جاگاهے نندینتءُ گوشتی: «إے مردم علماءُ طالبانی قدرءَ نزان أنت؛ بایدإنت آیانی دیمءَ عالمءُ طالبانی احترام إیرکنگ ببیت تا که آیانی قدرءَ پچاه بیارأنت».

واجه گوں إشیءَ که باز وش اخلاقءُ رحم دلی أت؛ بلے آئیءِ دیوان همینچو پر شانءُ پرهیبت أت که تا واجهءَ گپ مجتیں، هچکس په گپ جنگءَ نَلَگّ إت.

نادراهیءُ علاج

واجه سالءِ 1359هـ .شءَ گوں قلبءِ نادراهیءَ دچار کپتءُ گوں ڈاکٹرانی مشورهءُ صلاحءَ انگلستانءَ شتءُ رند چه علاجءَ پچ ترّإت؛ بلے یک سالءُ نیمیءَ رند پدءَ إے نادراهی واجهءِ جانءَ کپتءُ واجه چارماهءَ ماں نادراهیءِ نپادءَ وپت.

وفات

مرگ کیت یک روچے زندءَ آسر نیست    گراں بَریں درچکاں دائمءَ بَر نیست

وهدے که واجه ماں انگلستان ءَ أت چه گُـٹّگ نیمگ ءَ نادراه بوت که رند چه ایرانءِ آیگءَ گوں ڈاکٹرانی شورءُ صلاحءَ په گٹگءِ پیوندءَ آمریکاءَ شت.

بلے آملکءِ ڈاکٹراں گوشت: شمئی سن مزن إنت ءُ گٹگ ءِ پیوند کنگءَ هچ فائده إے نیست، گڈا واجه إیرانءَ آتک ءُ په وتی دیالیزءَ تهرانءُ مشهدءَ شتءُ ماں وتی عمرءِ آسری روچاں ماں مشهدءَ بستری بوت.

آسرءَ إے شهزانتیں واجه ، ماں 21مرداد سالءِ 1366ه .شءَ مشهد شهرءَ چه إے کوڑه إیں دنیاءَ رُکستی کتءُ بلوچ راجءُ اهلسنتی گوں وتی روگءَ داغدارکت.

واجه ءِ مبارکیں جسد چه مشهدءَ گوں بالگُرابءَ په زاهدانءَ آرگ بوتءُ ماں مسجدمکیءَ آئیءِ نماز جنازه وانگ بوت. نماز وانوکاں کم چه کم 60 یا 70 هزار نفرءَ رست أنت. رندءَ په واجهءِ وتی وصیتءَ آئی ءِ جنازه په روستای هیت شهرستان سربازءَ برگ بوتءُ وتی مجاهدیں پتءِ قبرءِ گورءَ همیشهءَ آرام گپت.

پاکیں الله وتی رگامیں رحمتاں آئی سرءَ بگوارینیت.(آمین)

إیردنت شپ جتائیءِ چو مرگءِ پریشتگءَ        بـے تو سَـگّــاں زندءِ گـورگـنداں چـتور

سرچمگ:

ندای اسلام چهارمی نمبر

زندگانی مولانا عبدالعزیز

ارسالي از دوست عزيزمان ابواحمدآسكاني